عجعــــــاجي!

Intro

Men Show ـ 3




عندي مشاكل



نحب راجل

No Video Available :(


3 Men Show




تقبلـــها

....

Rauchen kann tödlich sein

الحب الأعمى

الكـــارطة باجي

ـ الكارطة عندي و الا عندك؟
ـ الكارطة باجي!
ـ و الديناري؟
ـ باجي...
ـ و البرميلة؟
ـ باجي..
ـ بالله؟ و السبعة الحيّة؟
ـ يرحم عمي!
ـ تره شوف البهيمة بربي؟
ـ ااااه، البهيّمة ... باجي ..
ـ الأخ بنزرتي؟
ـ لا... ظاهر لي مروّح من ماتش السودان.
ـ ماو شكبوا عليهم عاد هذوكم! و زادوا كمّلوا قلبوا عليهم الطاولة، و نكشوا لهم شعوراتهم، و بزعوا عليهم التاي سخون هكاكة... و قالوا لهم : أيا خلصوا!
ـ ياخي حتى هوما في قهوة الباشا، موش عملوا لهم هكاكة زادة؟ حتى مولى القهوة قال لهم : العبوا رايضين، لا نجبد بيكم الـtapis!
ـ اسمع كي تجي تشوف، ما عرفوش يقصوها مالاول و الا راي تفضت. المشكلة في القصة!
ـ الكلهم أولاد ... قهوة... مصيرهم يلعبوا اطراح أخرى..
ـ لا يا ذنوبي، ماو السيد طلع مربّي الحلوف تحت حس مس.. كيف جات الانفلونزا.. طاح يذبح.. يذبح.. بالحلوف بالحلوف... ثماش ما يمنع مالكبوط!
ـ شوف الحلوف ا سيدي!
ـ امالة وينك انت... ماو متحالف مع الجماعة اللي البرّة...
ـ و قدامنا أحنا، حالف يمين فلوسه الكل حلال!
ـ يحححححححباني...
ـ (يعطس).. الحمد لله!
ـ رحمك الله!
ـ يرحم خويا...
ـ خويا يرحمه!

الحب الاعمى

1 ـ كيفاه عرفتــه؟
هي : عرفته في دارنا المرة الاولى.. و بعد وليت نراه كل مرة فين.. اما ديما يبدا معاه شكون... كنت صغيرو نخزر له باهتة.. اش محببهم فيه؟ اش فيه؟ بعد وليت نخزر له خايفة! قالوا لي رد بالك تلعب معاه! اللي يلعب بالنار، تتحرق شفايفه!
مرة نلقاه عنا، وقتها عنا ضياف، قربت له، و بابا يقوم يعيط عليّ تقول درا اش عملت.. من وقتها و انا بيني و بينه زوز ميترو قدر.. و الا هي خوف.. ما نعرش...
2 ـ اول مرة كيفاه؟
هي : قلت ما همش خير مني... سهى خير مني؟ أزين مني؟ خصتها! و زيد حسيت اللي كيف يبدا هو مع وحدة، يزيد في زينها الشطر! Et oui ça arrive راو...
1 ـ شنوة زاد فيك انت؟
هي : زاد في الروح! قبله كنت بلا روح.. ما نتطعم شيء.. توة ولى هو المطعم متاع كل شيء! أول ما عرفته، ما نقابله كان و أنا فرحانة، نحب نعمل جوّ.. نقابله موش خاطر نحبه، اما خاطر نحب نظهر و انا معاه... نحب سهى و خولة و دنيا و الكل يغزلوا كيف يشوفونا! أما مبعد، وليت ماعاد نحب حد يشوفنا.. وليت نقابلو كي نبدا معصابة و حالتي تكرب و باش نبكي... و الله يا ناس راهو .. راهو كعبة افيون السخطة... كي يحسس على شفايفي... نضيع جملة... نولي في برّ آخر... يدي ترعش.. و بدني يبدا باااااااااااااارد... على قد ما يبدا يشعل بالسخانة.. نبدا انا باااااااااااااااااااردة...
3 ـ الآنسة عاشقة؟
هي : ما نعرش.. اما هو اللي نلقاه في الوقت الخايب و الغصرات.. و هو اللي نلقاه كي ما عيني باش نلقى حد... ما يحكيش، ما يقول حتى كلمة.. أما يفهم كلامي الكل.. يفهم كل تنفيسة ناخذها و كل تنهيدة نخرجها.. يغمني بعجعاجة دفى و bien être... عجعاجة تغمنا في زوز، تقول جدار عازل، جوانح تطير بينا بعيد...
قبل كنت نخاف لا العيلة يفيقوا بيّ... الحق دارنا اكة المحافظين، و بابا .... يا ميمتي... كان نتخيل بابا يرانا... هو بيناتنا يستحق ياسر فلوس.. و انا كي نبدا ما في حاليش، ناخذ من عند بابا... نسرق أي نسرق.. بابا يعمل روحه أعمى ما راش في خاطري.. أما كان يعلم علاش نهز، ما يقلب الدنيا... اما توة.. ماعاد نخاف من حد.. و ما عاد يهمني حد... حتى بابا... نحبه أي نحبه.. و الحب أعمى موش هكة؟
2 ـ ما تتعاركوش؟
تي قبل، كنت ما نقابله كان بعد عركة.. تشعل مالاول.. و بعد تطفى بالشوية بالشوية... هو يذوب، و أنا نذوب... كان نطفيه، نولي متقلقة، نحس بروحي وحدي، خلايقي في صباطي، و الا في الشلاكة انا و شنوة لابسة.. حاسة اللي يضر فيّ، اما كيف ما قلت لك.. الحب اعمى!
1 ـ هذه مشكلة كبيرة...
2 ـ هذه وحلة
3 ـ هذه السبعة الحية!
هي : أنا ماعاش انجم نصبر عليه! العجعاجي يناديلي ... هاني جيـــــــــــــــــــــــــــــت!
( تخرج...
صوت قداحة...
دخان يخرج من وراء الستار...)
هههههههه، ايييياه!

هات شمة

1ـ ياااا، أخ. ياااا مواطن... تشمّ؟
2ـ في الكورة؟ الكلنا نشمو..
1ـ لا، لا، في الريحة...
2ـ ماها أه، تشم في ريحة قاعد؟
1ـ لا، مانيش نشم، على هذاكة نسأل فيك. قلت .. بالك فاتتني شمة..
2ـ اللي فاااات، شاااااط.
3ـ أنا و الروايح قصة طويلة.. قد ما نقلت من دار لدار، و من حومة لحومة، و من قد ما كتبت "ممنوع إلقاء الزبالة هناااا"، و "لعنة الله عليه اللي يكب الزبالة هنا" و "الله لا تربحه... في البروموسبور، اللي يكب الزبالة هنا".. شيء.. النافع ربي... باقي نشم في الروايح..
1ـ هذاكة الضمير تلقاه جيّف!
2ـ مرة مشيت للمحامي على حكاية الروايح هذه.. بعثني لـspécialiste... طبيب... قال لي انت منفوووووس، و يلزمك تتنفس! و من وقتها و انا نلوج على متنفّس...
3ـ علاه؟ الساعة تونس، ما شاء الله، فيها برشة ناس يتنفسوا... شمشم عليهم و اسئلهم...
2ـ انا الحق حاير بين الاثنين... يا نشم، يا ناخذ نفس...
1ـ أي هي الحق ولات مشكلة ها النهارين... أيا بابا، هاي شمة... (يعطيه حشيشا، يلفه و يتشممه مستمتعا، بينما يواصل الآخر خطابه) الجماعة اللي تشم، لاعبين فيها ياخذوا في نفس و برة، و هذا ما يتحاسبوش عليه، و تلقاه يدور بيه في الشارع عادي، بينما اللي ياخذ في النفس، يحب يظهر بشمّته.. و هذا ما يخليه.. فيه الريحة... و محل متابعة من قبل وحدات حظر الشمة. عجعاجي... عجعاجي كبير ياسر..
2ـ أنا مع الشمة... الشمة تنسيك في الروايح الكل، الشمة تخليك تشوف كل شيء، و تشم في كل شيء!
3ـ أي اما تبقينا فيها مصروف!
2ـ بالعكس! كانك شمام ، تنجم تدور الدولاب!
3ـ لا سامحني، دولاب الشمة، يلزمها نفس طويل راو!
2ـ لا لا من فضلك، سامحني، أنا غير موافق...
3ـ نعم؟ احترم نفسك يا سيد! و تو نشد نكسر لك راسك!
1ـ يا جماعة، الحكاية و ما فيها، انه احنا العرب، منفوسيــــــن. توة بالله سمعتوشي بجابوني و الا امريكاني منفوس؟
(يمهمهون أن لا)
امالة؟ احنا عنّا ما نقولو في حكاية النفس هذه، كان موش منفوسين، رانا الاولانين في العالم... شوف انت الملولي قداه ينفس! عنا عنا، قدرة تنافسية أيــــــــــــــــــــــــه... اسئل جماعة الاخبار متاع الثمانية...! تبقينا خلي العباد تتنفس شوية.. عسة عسة، غمة غمة، الدنيا غطّت ... و روايح.. واحد يشم..
في تونس راو
2ـ اللص يهز الكل!

الدخان باهي و موش باهي

1 ـ
الدخان باهي و موش باهي...
باهــــي على خاطر نهديوه كي نروحو مالالمان و مالطليان و مالحج زادة...
و موش باهي خاطر في الـFreeshop ما ثماش بوستة فيلتر...
2 ـ
الدخان باهي و موش باهي...
باهــــي على خاطر بفضل الـTVA بنينا السبيطارات و مراكز نقل الدم..
و موش باهي خاطر بفضله زادة، فيسع ما تعباو..
1 ـ
الدخان باهي و موش باهي...
الدخان باهي على خاطر ينسيك في المشاكل...
و موش باهي على خاطر كيف تتكنس، حتى الدخان المقتر ما ينفع معاها..
3 ـ
الدخان باهي و موش باهي..
الدخان باهي على خاطر يهزك لعالم آخر...
و موش باهي على خاطر .. يااااا ذنوبي لو كان ترجع منه!
2 ـ
الدخان باهي و موش باهي...
الدخان باهي على خاطر مكتوب عليه مضرّ بالصحة
1 ـ و موش باهي علاش؟
2 ـ على خاطر بالحق مضر بالصحة!

3 ـ
الدخان باهي و موش باهي...
الدخان باهي على خاطر يجلب برشة فتـيـــات
2 ـ surtout كي يبدا Marlboro Light!
3 ـ و موش باهي على خاطر أول فتاة تحرقك أنت و باكوك..

السيستام!

1 ـ
D’ailleurs يقل لك السيقارو هو الشيء الوحيد الذي يحترق من أجلي...

2 ـ
يحححححححـ... باني يحباني...

1 ـ
En plus، كي تبدا متغشش، فادد، متيقر، ميؤوس من حالك، مفلقط، متقعبط.. تلقاه كان هو..
في فرح، ان شاء الله مبروك يا مادام، و الله خذيت كيافجي صحيح.. (يضحك)، في ميتة، البركة فيك ان شاء الله فداك، هاو سيقارو و ان شاء الله ما عندك سوء... في حنة، يا خويا خويا، و الله و عملتها، اوكة خليت لك كرطوشة Leger في كنسترو الحنة (يضحك)... حتى في المسرح.. يكذب عليك يقل لك ممنوع.. (يضحك) تمشيش تجد عليكم...

2 ـ
انهار الجمعة الخاااااامسة مساء، في حصة العيادة التلفزية.. قالوها : التدخيـــــن مضر بالصحة.

1 ـ
تي هو المثل العربي الأصيل آش يقول؟ tant qu’on a jamais goûter, on ne sait pas de quoi ça s’agit...

2 ـ
شكّب... طززززز... أنا نعرف! هذه يقريوها الدول المتقدمة و المتحضرة، Monsieur Koblei Khan في الأندوشين يرحمه عمل لها محاضرة كاملة... إيـــــه، وينك يا سي Koblei! كان يقول (بالاندوشين راو يحكي)
يسكت يسكت و يعملها!

1 ـ
على روحه؟

2 ـ
بحيث هو راو système كامل ... تبعوا معايا... أوّل جبدة صدرك يتنفخ، يعمل كي الـDéchirure، معناها تمزّق...
مع هاك الجبداااا، ثمة حبيبات نيكوتين، كي الحبيبات الزرقاء، لا لا موش متاع الركايب، هاذوما متاع الرواري.. أي.. عاد اذومة تلقاهم، يتعداو على الحلقوم، ينظفوا البلغم و ما تابع، كان كليت شوية مدمس و الا حاجة... أما مبعد، ماو ريحة المدمس مووووش لاك الكل.. الحبيبات ..ممم... تهيج.. و تدخل بعضها، و في بلاصة ما تهبط اللوطة، تطلع الفوق.. logique و الا موش logique؟ هاوكة علاش، من دون الدخان الكل، النيكوتين، يضرب المخ!!!
كي يوصل غادي، ثمة systeme كبير ياسر يستنى... هذاية، يعمل له Extraire كيما في الـwindowds فهمتها؟ هاك الحبيبات الزرقاء، تخرج اللي كان مخبـــــي، و كيما يقولوا يا أزرق مالبرة، آش حالك من داخل! ثمة اللي تطلع بالحق زرقاء، يا bleu mari، يا azzuri يعني زنزفوري.. و كل لون يعني لنا نوع متاع شيخة، مثلا الازرق اللي عاطي على الاخضر، معاناها : 0 في الـbase de donnée؟ ايه شنوة المشكل؟ هههه...
أما ثمة، كعبات يبداو فالصو.. اللهم ما عافينا، يضيعوا الـequilibre جملة.. بالاخص على اكة اللي يتكيفوا جدد، فهمتني؟

1 ـ
على هذاكة يقل لك : راس الفرطاس قريب لربي؟

2 ـ
أما، اللي فاتك اغرب! كيف يطلعوا ها النيكوتينات لفوق.. الحضبة في القرجومة تنقص، و يهبط الشيء للرواري.. و أخص بالذكر، اكة CO2 هذوكم.. أوكة يصوروهم ديما وحاد أشرار و خامجين، و ضحكتهم صفراء، في أكة جسم الانسان .. يا حسرة...
Co2 هذومة، يعرقوا ياسر.. وين يضربهم الهواء يعرقوا... يي عاد كي يوصلوا للرواري.. ما شاء الله، courant d’air عاليمين، و courant d’air على اليسار... امشاو... خنزرو... يصير لهم.. l’effet de serre حاشى من يتصنت...

1 ـ
يرحم فمك يا Monsieur Koblei!

2 ـ
هذاكة علاااااااش، اللي يتكيف، يعرق مالداخل، و يتمص بكله، هوما ماو يقل لك الدخان يضعف، مناش؟ ماو مالـ effet de serre! مالة نردو بالنا يعيش خويا، و اخطانا من الدخان... و عليكم بالشيشة! الشيشة... تحل الصدر!

1 ـ
لااااااااااااااااااااا...
ما شاء االله أحنا... في تونس..

3 ـ
اللص يهز الكل!

نحب على راجل

نحب... نحب.. نحب نحب نحب.. حب حب .. حبحبحبحب.. نحب .. نحب راجل السفا!!!
(تبلبز شعري؟)
يا ربّي نحب على راجل! فديت من عيشتي!! فديت...
يا اخي اش ناقصني أنا؟؟

القراياااااااااا و قريناها..
الشهادااااااااا و خذيناها..
الخدماااااااااا و هاني نخدم..
الزيــــــــــــــــــــــــــــــن (تضحك) .. هاكم تشوفوا...

و الله تعقدت تعقدت... نحب نعرف كيفاه يخمموا الرجال...
راو راو... يبداو يلوجوا على الحلوزي السفا... ا بنات أقل منّي تكازاااااو من ويــــــــــــــــــــــــــــن...
الدنيا تعطي للغفاصة... السفا..

(و كـأنها تذكرت أمرا يسعدها..)
آكة المرة في عشاء عملته صاحبتي.. هو موش عشاء، عشاء. هكة و برة.. زعمة زعمة هاني متاع هاك الرويق... (تضحك) اسمع.. هو هكة مكستم... و مهندم.. ماشاء الله.. قال لي يخدم في هاك السفا.. هذاكة متاع Leasing... جاني و قال لي..
Vous dansez mademoiselle؟
Mais bien sûr!!!
اما لا لا، ما قلتها لوش... (تعود للضحك).. عملت روحي نخمم... و بعد قمت بفيانة، و قلت له :
Avec plaisir monsieur!
مممممممم...
بزهري الغناية وقتها (La vie en rose)... اوووووه...
(تغني و ترقص حالمة ...)

Quand il me prend dans ses bras

Il me parle tout bas,

Je vois la vie en roooose

(و كانه يبتعد عنها، تنقطع عنها و تناديه..)
آي! استنى! مازلت ما خذيتش نومرويا!!! *2161616 .. أيا طلع النومرو الاخر أي... (تضحك)...
السفا وين مشيت؟؟!!!
صاحبتي قالت لي هرب مالريحة.. (باستغراب) أما ريحة؟ تي متكيفة له بالذمّة أبـــنّ سيقار نلقاه...
ايــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــه.. آشر حيت دخان بعدها...
في الاخر قلت يلزم نلقى حل...

مشيت للعرافة.. أنا دخلت و هي حطت كمامة السفا... قالت لي... خايفة من انفلونزا الخنازير و الا شنية... أشششششش... (بخفوت) الكارطة تتكلم... قالت لي... اللي تلوج عليه جاي.. جاي من بعيـــــــــــــــــــــــــــد... جاي على حصانه... (ما فهمتش منين دبرت جوكير راكب على حصان).. أما خلاتني نححححححححححححححلم نحححححححححححلم...
(بسعادة الحالمة)
زعمة يجيني؟ يبدا هكة لابس costume في الأكحل، ريحته بنينة فاوحة بقارو من كوبا.. ممممممم... و مشيته... virile، و macho، و عنده بوسة خالة فوق فمه.. (تضحك).. يجيني على حصان، على بهيم، على R5 على 4L، ما يهمنيش.. حتى الشباك خليته محلول.. ثماش ما يجي يخطفني...
مرة قمت، نلقاه مسكر.. مشيت نججججججججججججري للعرافة... (نلقاها بدلت الـcouleur متاع الكمامة).. قالت لي جاك .. سطعته الريحة.. ولّى هرب و سكر الشباك وراه!!!
السفا.. حتى العرافة خذات فيّ باي؟ باهي باهي يا للا العرافة، آش نعمل مالة تره؟
(متسائلة) نشوف واحد ما يشمّش؟ لا لا موش ما يشم شيء، أما محروم من حاسة الشمّ.. بالعربي... مُخنان..
مخنان؟ أوووووو... آش نزمر بيه؟ وووو عليّ مخنان... لا.. لا.. ما يساعدنيش، يعمل لي جوقة موسيقية في الدار كل يوم مخطة نوع...
لا.. لا.. لا.. نولي نمشي و نعفس في المشوارات و تااااااكل بعضها...
ووووو عليّ... ووووو على السّعدي، فاش وليت نخمم... السّفا هذا الكل في جرة الرجال يكب سعدهم على ما كرهتهم.. يا ربي على ما كرهتهم.. يا ربي ابعث منهم واحد بركة.. واحد يزي نعانيه السفا... نعمل له رشششتة.. و كي يروح مالخدمة نعاركو خاطر ما شراش الخبز، و نقنقن عليه كي يحط يتفرج في الكورة.. و كي نمشي للحجامة نوري لهم خاتم متسلفته و نقل لهم : un cadeau من عند الـmonsieur! (تضحك في حزن)...
و أنا صغيرة، قالوا لي كي تطلع له شيبة في شعره، معناها سعده قويّ، و يا للا نهار اللي طلعت لي شيبة، قلت كهو.. الخطاب باش يشدوا الصف على الباب..
خلطت الشيبة الثانية...
و الثالثة...
هاو شعري توة الكله شيب..
(خارجة)..
الكله شيب..
الكله شيب...
الكله شيب السفا، الكله شيب...!!!

أنا عندي مشاكل

أنا... أنا..
أنا.. عندي مشاكل..
أنا .. مانيش خايبة.. أنا نحب الخير للناس. أنا نحب الناس الكلّ!
و السماء الزرقاء..
و النوّار كي يفوّح الدّنيا..
و Boby كيف يبدا يجري من بلاصة لبلاصة...
أما وينه هذا الكل؟؟؟
السماء مغيـــــــــــــــــــــــــمة...
و النوّار ذااااااااااااااااااابل...
و Boby مات!!!
(تتناول سيجارة، تتأمّلها، تريد أن تدخن، تتراجع، و تعيد السيجارة...)

أنا.. أنا ..
عندي مشاكل..
حتى كيف خذيت الباك، قلت الدنيا باش تضحك لي، بابا كشبر في وجهي و قال لي :
كان تحب Architecture، أيكة California، أما تونس لا! لا!

California؟؟
و نقرا عند Peter Eisenman؟
و Steven Holl؟
نبني برج Pesa في تكساس؟ و نعمل Palm Island في ميامي؟
و ماما؟؟!!
ماما نفارقها؟ مسسسسسستحيل!
قعدت شهر و أنا: ماما، Cali، ماما، Cali، ماما، Cali...
Cali..
Cali..
Cali..
Cali..

(تتناول سيجارة، تتأمّلها، تريد أن تدخن، تتراجع، و تعيد السيجارة...)
أنا... أنا...
عندي مشاكل..
في California، قلت باش تزهى الدنيا، و ترجع السماء الزرقاء، و النوّار الفاااوح، و نلقى... و نلقى l’amouuuuuuur de ma vie!
ما كانش غني.. لا عنده Villa في Beverly Hills، لا GT 500 Eleanor، لا شركة في Sillicon Valley، إنسان عاااااااااااااااااادي... le plus commun...

Un simple directeur في Apple ...

برغم هذا الكل تحملت...
و يا ليتني ما تحملت...
(تتناول سيجارة، تتأمّلها، تريد أن تدخن، تتراجع، و تعيد السيجارة...)

أنا... أنا...
عندي مشاكل...
كي عرّسنا، ظهر لي على حقيقته...
أناني! ما يرى كان روحه! طلع لي روحي!
مرة، روّح العشرة متاع الليل، لقاني مع un ami à moi..
قال لي : شكونه ؟
شكونه؟؟؟! Même pas يعرف أصحابي؟!!!!!
هذه عيشة ما تنطاقش..
ما تنطاقش!!!
توة، آخر طلعة، آخر طلعة...
يحبني نروّح قبل ماضي ساعة متاع الليل!!!
ناقص كان يقتلني!!

(تتناول سيجارة، تتأمّلها،
تضعها على شفتيها،
تشعلها،
تأخذ نفسا عميقا...)
آآآآآآآه!
(تخرج)
ماما...
ماما...
ما عاش نجم!
نحب نروح...

Rauchen kann tödlich sein !

Rauchen kann tödlich sein !

زَيْــن!

(تبتسم، تنظر إلى الجمهور.
تصبح ابتسامتها حيرة..)
(و كأنّها تسأل الجمهور..)
موش زَيْن؟

بالعربي : Fumer peut tuer.
أنا و الله ما جبتها من عندي. هكة قالوا لي.
كيف كنت صغَيرة، عمّي قالها لي و هو يشيّش : (صوت بقبقة) بنتي! ابعد ابعد، موشي باهي الدخان!
و امراة عمّي كانت تطبطب عليّ و تقول لي :
يا بنيتي ما احلاك و ما ابنك. ان شاء الله تكبر، و تكمل قرايتك و تاخذ راجل.
(تنقلب سحنتها فجأة و تهتف فيها )
أما ردّ بااااااااااالك تاخذ راجل عنده شيشة!
(تكاد تبكي)
راك تولي ضرة يا بنيتــــــــــــي .. هي هي هي..

(تعود إلى طبيعتها)
و كيف دخلت نقرا كنت ديما نسمع الدكتور حكيم كلّ صباح:
برشة ناس كل وين تكمل وجبتها الغذائية، تمشي تعمل سيجارو. و هذا ما يخلي الوجبة متاعه عديمة المنافع. السيجارو قاتل و لذا ما تتكيفوش كي تكملوا الماكلة.

و الله و الله كنت ياسر ياسر نخاف من الدخان.
في الـLycée ما كنتش نحكي معاهم شلة الدخان. و كيف حاشاكم.. (تتململ) و حاشى قدركم ( تململ، و تفرك ساقيها) ... مسسسستحيل نمشي لـtoilette lycée! خاطر قالوا لي ...
(تصمت ...)
(تنظر يمينا و يسارا و كأنّ هناك سرّا عظيما)
(تقولها برهبة و ببطء)
يتكيفوا!!!
(تظل تنظر إليهم طويلا، ثم تستدير بغتة و تقول:
و دخلت للـINSAT!!
( تدوح برأسها و يديها..)
(تستدير بغتة..)
بالطبيعة الكلكم تتذكروا نهار التعميد Baptisme..
أكة النهار اللي عرفتوا فيه الـℓ∂ℓ و Triple Integral!!
اليـَوم هاكة قلب لي حياتي الكل و بدل لي نظرتي على كل شيء..
إلا الدخان!!
و الله هاك الخط اللي بين الـHall و الـBuvette لا عفسته! قالوا لي ...
(تصمت ...)
(تنظر يمينا و يسارا و كأنّ هناك سرّا عظيما)
(تقولها برهبة و ببطء)
في الـ Buvette يتكيفوا!!!

(صمت)
Rauchen kann tödlich sein !
زَيْــن!
حتّى كيف عملت Bio، زَيْن.
زَين و عَين و tablier بَيضاء تقول علينا ملايكة، كيف قمرة 14، نطلو مرة في اليَوم، نمشيو للـ Buv..
(تبلغ الخط.. تتراجع )
(و كـأنها تخاطب صديقاتها )
لا.. لا.. ما نجمش، هاني هَوني نستنى.. (تضحك في ارتباك)

(تعود لحالتها.. و تهمهم )
Rauchen kann tödlich sein !
زَيْــن!
حتّى كيف قرَينا (حطّ حاجة صعيبة ) و ما فهمنا شيء زَين (مبتسمة)..
و كيف تجي تعدّي DS biochimie على أساس documents autorisés، يطلع لك DS في الفلسفة و الخلابز... زَين زادة!
(تبلغ الخط .. تتراجع في ارتباك)
(و كـأنها تخاطب صديقاتها )
Désolée les filles، أي هاني هَوني نستنى..

Rauchen kann tödlich sein
زَيْن..
حتّى كيف عطاونا نهارين révision زَين زادة!
(ثم بمحقرانية..)
آش عنا ياخي؟ شوية ...... (تعدّد أسماء الموادّ..)
كهوّ !

2 Jours révisions c’est pas suffisant !!!
2 Jours révisions c’est pas suffisant !!!

علاه يا ديني؟
الواحد ماو يكون à jour شوية...
تخدم exposé
تعمل rapport
و بعد تعمل à jour

تخدم exposé
تعمل rapport
و بعد تعمل à jour

تخدم exposé
تعمل rapport
و بعد تعمل à jour

تخدم exposé
تعمل rapport
و بعد تعمل à jour

تخدم exposé
تعمل rapport
و بعد تعمل à jour

تخدم exposé
تعمل rapport
و بعد تعمل à jour

و ترقد!
(تبلغ الخط .. تكلم الفتيات ...)
لا .. merci هاني هَوني نستنى..

Rauchen kann tödlich sein
زَيْن..

موش زَيْن؟
(تتجاوز الخط...
تجد على الأرض الميدعة البيضاء، و سيجارة..
تلبس الميدعة،
تتناول السيجارة..
تأخذ نفسا عميقا..)
اففففففف Biochimie
اففففففف Microbio
اففففففف Biomol
فففففففف Immunoooooooo

تخرج و تلقي بالسيجارة و تقول
فففففففف Insaaaaaaaat

جيهان بن عليّ
بتصرف
:p